رواية همس الاسر الفصل 16بقلم عشق

عدي الوقت وخلصت همس شغلها وروحت علي البيت وهي مبسوطة من اول يوم لها لانها قدرت تتعرف علي الناس وتتكلم معاهم ودا محصلش من سنين
دخلت البيت وكانت الانوار كلها مطفية اول ما قفلت الباب الانوار اتفتحت ولقت زينة وحاجات كتيرة حواليها فرحت همس بالمنظر وبصت حواليها لقت لينا جاية ومعاها تورتة في ايدها
همس هو في عيد ميلاد واللا اي

لينا وهي بتحطها علي السفرة لا دي هنحتفل بيها
همس هنحتفل بايه بردوا
لينا بيكي طبعا انتي بدأتي حياتك الجديدة من النهاردة واظن لازمها احتفال
همس بس يعني ليه التعب دا
لينا تعب اي بس تعالي يلا عشان تطفي الشموع
قربت همس من لينا وكانت لسة هتطفي الشموع بس لينا وقفتها في اللحظة الاخيرة
لينا انتي هتعملي اي اتمني امنية الاول وباذن الله هتتحقق
ابتسمت همس لها واتمنت امنية وبعدها طفت الشموع وبصت للينا وحضنتها جامد
همس شكرا شكرا شكرا بجد
لينا اهدي انتي كدة بتخنقيني
سابتها همس وهي فرحانة بكل اللي بيحصل معاها وببداية حياتها الجديدة اللي حاسة انها هتبقي خير ليها
لينا قولتلك قبل كدة متشكرنيش انا مليش اخوات واول ما شوفتك اعتبرتك اختي وطبيعي اني اساعدك
همس بس انا فرحانة اوي
لينا طب تعالي يلا واحكيلي عملتي اي النهاردة في الشغل
همس كان يوم حلو اوي اتعرفت هناك علي الكل وصاحبت واحدة اسمها مني حبيتها اوي وفي سهير كمان وسليم دا بقي ما بينه وما بين مني قصة حب بس هو ميعرفش وهي متعرفش وو
لينا حيلك حيلك اي دا كله عرفتي دا من اول يوم
همس ايوة كل اللي في الشركة كويسين ماعدا في واحده متكبرة اسمها ابتسام دي محبتهاش
لينا طب يلا بطلي كلام ويلا ناكل من التورتة واللا انتي مش عاوزة
همس لا ازاي عاوزة طبعا
لينا انا هقوم اجيب لينا عشاء الاول انا لسة مكلتش
همس وماكلتيش ليه
لينا استنيتك عشان ناكل مع بعض كلها دقايق وهيكون الاكل علي السفرة ادخلي غيري لوقت ما اخلص
همس حاضر بس هي فين حور
لينا حور نيمتها من بدري تصدقي ان بنتك دي هتبقي صاحبتي
همس استني لما تكبر طيب انا هقوم