رواية نوح والأمانة الفصل الحادي عشر11-12

احسن هو ده المهم وبعدين افرضى أنه مانسيش شكلك وانتى صغيرة تفرق ايه وبعدين عاوزة اقوللك على حاجة ..حبى اللى يحبك من جواكى يانيللى مش اللى يحب شكلك
نيللى بس مانقدرش ننكر أن عيونا بتحب قبل نفوسنا يا أمانة
أمانة حب العيون ده بيبقى اعجاب وانبهار لكن حب النفوس ده هو اللى بيتاصل جوانا بس برضة انا حاسة أن حاتم معجب بيكى واوى كمان
نيللى طب ننام بقى واللا ايه
أمانة وهى تتثائب انا نمت اصلا تصبحى على خير
نيللى بابتسامة وانتى من أهله حبيبتى
.
فى منزل حاتم
يجلس كل من حاتم واسامة وأيمن ويخيم على الاجواء شئ من التوتر
حاتم أهدى بس يا اسامة بالراحة
أسامة ببعض الڠضب أهدى ايه بس يا حاتم يعنى عجبك اللى عمله تقدر تقوللى استفاد ايه من الكلمتين الخايبين اللى قالهم
ايمن ببرود لو على الاستفادة ..فأنا استفادت وكتير اوى كمان
أسامة وايه بقى اللى استفدناه ياعم ابو العريف
ايمن انى شبه اتاكدت أن جوزها ملطوخ على قفاه
أسامة ياسلام على الالفاظ الهاى كلاس .واتاكدت ازاى يافصيح
ايمن يابنى انت ماشفتش تعبيرات وشه كانت عاملة ازاى ده غير أنها لما حاولت تنكر فى الاول قاللها انها فعلا كانت هناك فى الوقت ده بس مش بصوت عالى انا اللى سمعته عشان كنت واقف جنبهم
حاتم برضة يا ايمن ده شئ مايخصناش ومايفرقش معانا ان كان عارف واللا لا كل واحد حر فى حياته
ايمن بتنهيدة يمكن ماتكونوش بتهتموا بكلامى أو رأيى أو شايفين انى مش اد المسئولية لكن اللى انا لمسته اليومين اللى قعدتهم عند أمانة أن نوح مهم جدا عند أمانة وماتنسوش أنه يعتبر كان قريبها الوحيد هو ومامته لحد ما احنا ظهرنا يعنى كل أهلها فماينفعش يبقى فى شك ولو واحد فى المية أنه بنى ادم مش كويس واسكت
وكمان عشان حسيت أنه مايستاهلش يبقى عايش وهو مخدوع بالشكل ده لازم على الأقل حد يلفت نظره أن مراته مدوراها بالشكل ده وماتنكرش ياحاتم أن انت نفسك كنت بتشتكى من أسلوبها وطريقة معاملتها لما جاتلك الشركة اكتر من مرة بحجة العقود بتاعة الشغل
حاتم تصدق أن دماغك طلعت عالية يا واد يا ايمن مع أن اللى يتعامل معاك مايقولش كده خالص
ايمن وهو يمثل الغرور انا بس مابرضاش اتكلم عن نفسى كتير
.
فى شقة أمانة
تجلس أمانة مع نيللى ونعمة يتحدثون عن ذكرياتهم بين ضحكاتهم ليستمعوا لجرس الباب لتنهض أمانة وهى تضع نقابها وتتجه إلى الباب لتجد أن القادم ماهو الا نوح
أمانة اهلا ..اتفضل
نوح ازيك يا أمانة اخبارك ايه
أمانة بود انا الحمدلله تمام ادخل ..مراة عمى ونيللى قاعدين جوة فى الليفنج
لياتيهم صوت نعمة من الداخل تعالى يانوح انا هنا
ليدخل إليهم نوح وهو يحمحم بصوته ويلقى السلام ثم يجلس بجوار أمه وهو يقول بمرح هو مافيش اللا أمانة واللا ايه مش ناوية تسألى عنى شوية
نعمة وهو انت ناقصك حاجة يابنى
نوح ناقصنى انتى ياحاجة انا بقيت اشوفك صدفة
أمانة احنا هنقطع على بعض واللا ايه
نوح ااه وبقولك ايه هو الكحك خلص
أمانة لا لسه عاوز اجيبلك
نوح ياريت لو كحكيتين احسن عاوز اكل حاجة حلوة
نيللى ضاحكة هو انتو ممسكين أمانة التموين واللا ايه بتعينوا عندها الحاجة وبعد كده تستلفوها
أمانة ااه يابنتى طبعا وبالذات الكحك ده ممتلكات خاصة
قالتها وهى تضع طبق ملئ بحلوى العيد أمام نوح ثم قالت صحتين وهنا
نوح وهو يتناول الكعك هتيجى معايا اشوف عربية زى ما اتفقنا
أمانة حاضر شوف عاوز تروح امتى وقولى
نوح ياريت لو النهاردة عاوز اخلص